© FEI | 28/04/2023 | Mulleres con Historia: Wangari Maathai

Wangari Maathai, a ecoloxista Premio Nobel da Paz

Foi a primeira muller africana en recibir o galardón pola súa “contribución ao desenvolvemento sostible, a democracia e a paz”

A bióloga, activista ecoloxista e feminista Wangari Maathai (1940-2011, Kenia) foi unha das grandes mulleres pioneiras da Historia do Mundo Contemporáneo. Ademais de ser a gañadora do Premio Nobel da Paz 2004, tamén foi a primeira muller en África Central e Oriental en obter un doutorado e foi a primeira decana da Universidad de Nairobi.

Tras a súa formación en Bioloxía nos EEUU, regresou a Kenia e iniciou unha carreira docente coa que comezou a asumir a imposibilidade de desconectar os recursos naturais do país dos problemas sociais, da súa economía e da súa política. O activismo foi un dos pés máis importantes da súa mesa vital.

Foi unha importante impulsora da educación, a democracia, dos dereitos das mulleres e da conservación medioambiental en Kenia. O seu activismo ecoloxista foi o que motivou o nacemento da súa célebre iniciativa: dende o National Council of Women of Kenia comezou a impulsar a plantación de árbores para a conservación medioambiental e a mellora da calidade de vida. Finalmente, fundou o Movemento Cinturón Verde en 1977, a través do que as mulleres empezaron a xestionar sementes, a plantalas e armar viveiros de árbores.

Actualmente xa chegaron a plantarse ao redor de 51 millóns de árbores no seu país. Esas sementes outorgaron independencia económica a todas aquelas mulleres dentro dun contexto machista e desigual. É por iso que se considera que este movemento amosaba moita preocupación por dotar de ferramentas coas que empoderar ás comunidades e especialmente ás nenas e ás mulleres, para que puidesen establecer espazos máis sostibles, democráticos, pacíficos e igualitarios.

Coñecida como “Mamá Árbore”, Maathai, foi elixida membro do Parlamento de Kenia e viceministra de Medio Ambiente nos anos 2000 e dende a súa posición continuou defendendo a importancia dos seus valores e ideais cara a construción dunha sociedade mellor.

«A educación, se algo supón, non debería alonxar ás persoas da terra, senón inculcarlles máis respecto por ela, porque as persoas educadas están en posición de entender o que se está perdendo. Como lles dicía aos silvicultores e ás mulleres: non precisades un diploma para plantar unha árbore»

Wangari Maathai.

Voltar