© FEI | 09/11/2022 | Programa Reincorpora: Proyecto Patios Inclusivos

O noso proxecto PATIOS INCLUSIVOS resultou finalista nos Premios Aprendizaxe-Servizo 2022

No proceso de avaliación participaron 72 persoas expertas de todo o estado, e o xurado valorou positivamente o noso proxecto, pola súa calidade educativa e o seu impacto social e comunitario.

Os Premios Aprendizaje-Servicio están organizados por Fundación Edebé e a Red Española de Aprendizaje-Servicio, coa colaboración do Ministerio de Educación y Formación Profesional e contan co apoio de diversas empresas, entidades sociais e institucións.

O acto de entrega dos premios terá lugar no marco do XV Encuentro Estatal de Aprendizaje-Servicio 2022, que se celebrará en formato presencial (para Andalucía) e en formato online (para o resto de España), o 16 de decembro desde Sevilla.

O noso proxecto, PATIOS INCLUSIVOS, nace da comparativa nos problemas de convivencia nos espazos comúns de dous centros (centro escolar e Centro penitenciario) que, salvando as distancias, nacen da mesma base: discriminación, estereotipos, roles, competitividade…

Este proxecto pretende achegar o concepto de espazos inclusivos - referímonos a ese terreo ou lugar onde se facilita a convivencia - a ambas as comunidades, a través da análise da convivencia nos centros, para crear alternativas que dean resposta ás problemáticas detectadas.

O servizo concrétase en crear materiais e xogos para o patio do colexio que melloren a convivencia á vez que respecten o medio ambiente.

O obxectivo é convertelo nun espazo pedagóxico aberto a toda a comunidade educativa que funcione como extensión da aula, onde se traballarán valores como a cooperación, a capacidade de relación, o compromiso ambiental, a tolerancia, a responsabilidade, a igualdade, entre outros. Esta proposta fomenta a aprendizaxe e desenvolvemento de condutas e actitudes positivas no seu tempo de lecer.

Este é o noso proxecto, clica aquí.

Voltar