© BBC | 26/08/2019 | Imagen de la inventoria y científica Hertha Ayrton

Hertha Ayrton, na elite da ciencia mundial

A matemática, inventora e científica inglesa Hertha Ayrton é lembrada pola súa gran achega á ciencia e o seu incansable activismo feminista

Como a maioría de mulleres recollidas na sección Mulleres con historia da nosa web, Hertha  Marks Ayrton destaca por romper coas barreiras que tiñan as mulleres ata non fai moito (e que en certos sentidos aínda existen), á hora de querer realizar a súa vida e a súa carreira profesional coa liberdade que se lles presupón aos homes.

Enxeñeira, matemática, científica, física, inventora e feminista; a muller da que falamos neste artigo rompeu con todo o establecido tanto na súa vida persoal como profesional; na que alcanzou o máis alto a pesar das pedras que atopou no seu camiño.

Hertha Ayrton naceu no seo dunha familia xudía na Inglaterra de 1854 co nome de Phoebe Sarah Marks como a terceira de 8 irmáns. O falecemento do seu pai en 1961 cambiou a súa infancia e tivo que aprender a coidar dos seus irmáns. Xa nesta época o seu carácter e independencia manifestáronse, afastándose das crenzas relixiosas da súa familia e xa na súa adolescencia participaba activamente nos movementos de sufraxio feminista.

Declarada agnóstica quixo cambiar o seu nome polo de Hertha, a Nai terra segundo a mitoloxía teutoa.

Grazas á intervención das súas tías, que lle propuxeron que se fose a vivir con elas e os seus fillos á escola que dirixían en Londres, puido cursar os seus estudos. Con eles aprendeu matemáticas e ciencias; as que se converterían na súa paixón.

Máis tarde accedeu e estudou en Cambridge, aínda que tivo que finalizar os estudos na universidade de Londres porque Cambridge non outorgaba graduados a mulleres, a pesar de que aprobara o exame final de Matemáticas. Con todo, a súa época alí foi moi destacada, pois foi neses anos nos que inventou o tensiómetro para medir a presión sanguínea; fundou o corpo de bombeiros de Girton e cofundou un club de matemáticas xunto a Charlotte Scott.

 

Decisiva na electrificación segura da sociedade
A súa vida profesional nun ámbito practicamente reservado para os homes, na que sufriu gravemente a discriminación dos seus colegas e da sociedade, levouna a un activismo e á loita polo dereito do voto feminino. Así, é recoñecido o seu labor de defensa e axuda a moitas mulleres da época como Marie Curie e foi vicepresidenta da Federación Británica de Mulleres Universitarias e da Unión Nacional de Sociedades polo Sufraxio das Mulleres.

Destacada inventora, varias son as patentes que realizou e que contribuíron a numerosos ámbitos. Entre elas a máis coñecida é a mellora do arco eléctrico, moi importante para dotar de electricidade segura á sociedade do momento.

Como todas as mulleres que sobresaían nos seus respectivos traballos, Hertha foi pioneira e referente para as demais. Así, en 1899 foi a primeira muller en integrar a Institución de Enxeñeiros Eléctricos e en 1906 recibiu a Medalla Hughes de parte de Royal  Society, a mesma que pola súa condición de muller non a deixara presentarlles anteriormente o arco eléctrico e tivo que facelo un home por ela.

Un 26 de agosto de 1923 falecía Ayrton e pasaba á historia, chegando a ser escollida como unha das mulleres británicas máis influentes na historia da ciencia. E un símbolo da loita feminista en todo o mundo.

Voltar