© FEI | 02/07/2020 | Amelia Earhart

Amelia Earhart, a pilota que se converteu en lenda

24 de xullo de 1898 en Atchison, Kansas (Estados Unidos) - 2 de xullo de 1937 nun lugar descoñecido

O 2 de xullo de 1937, Amelia Earhart e o seu compeiro de voo, Fred Noonan, no seu obxectivo de da-la volta ao mundo en avión seguindo a liña do ecuador, despegaron de Nova Guinea cara a illa de Howland, pero nunca chegaron ao seu destino. Durante o traxecto perdeuse o contacto con eles e, pese á mobilización de numerosos efectivos, nunca foron atopados. A súa desaparición está chea de misterio e existen multitude de teorías ao seu arredor. Que pasou con Amelia Earhart?

Amelia Mary Earhart naceu o 24 de xullo de 1898 en Atchison, Kansas (Estados Unidos). É a pilota máis coñecida de todos os tempos e foi unha figura clave na historia da aviación e a exploración.

Coa Primeira Guerra Mundial, Amelia viaxou coa súa irmá a Canadá. Alí fíxose enfermeira voluntaria e atendeu a moitos pilotos heridos en combate. Neste periodo, desenvolveu unha grande admiración polos aviadores e tivo a oportunidade de observar as prácticas do Real Corpo Aéreo do Reino Unido.

Sería en 1920, tras tomar un voo de tan só 10 minutos durante un espectáculo aéreo, cando decidiu que tiña que aprender a pilotar. Facendo multitude de traballos, conseguiu diñeiro suficiente para dar leccións coa pioneira da aviación estadounidense Neta Snook e a partir de alí comezou a forxar a lenda.

En 1921 comprou un biplano de segunda man, en 1922 voou a 14.000 pés de altitude e en 1927 foi elixida por un piloto e publicista para ser a primeira muller en viaxar nun voo transatlántico como pasaxeira. Pouco despois, realizou con éxito numerosos voos en solitario por Norte América e en 1930 converteuse na presidenta de Ninety-Nines, unha organización de pilotas en favor das mulleres na aviación.

Earhart casou co editor da súa autobiografía, George Putnam, en 1931, e un ano máis tarde converteuse na primeira muller que realizou a travesía do Atlántico en solitario. Poucos anos despois, en 1935, efectuou a travesía en solitario entre Honolulu (Hawai) e Oakland (California), co que recorreu unha distancia maior ca que separa Europa de Estados Unidos.

Amelia Earhart perdeuse en xullo de 1937 cando sobrevoaba o océano Pacífico a bordo do seu avión Lockheed Electra. Algunhas teorías indican que esta aventureira faleceu nun accidente de avión, outras que o aeroplano puido quedar sen combustible e outras suxiren que ela e o seu compañeiro puideron vivir un tempo nalgunha illa deshabitada do Pacífico.

Voltar