Esta mesma mañá, o Secretario Xeral do PSdeG, Gonzalo Caballero visitou, acompañado de Carmen Avendaño, as instalacións da Fundación Érguete-Integración. No acto, ao que acudiron numerosos medios de comunicación, tamén estaban presentes Marta Freire, tenente alcaldesa de Moaña e Jesús Bouzas.

 

Durante o percorrido visitaron os diferentes espazos da Fundación. O Secretario Xeral interesouse pola situación económica de Érguete, polo seu sistema de financiamento e pola realidade na cidade de Vigo en canto ao consumo de drogas se refire. Tras o percorrido e unha conversación distendida, tanto Carmen como Caballero atenderon aos medios.

 

A presidenta agradeceu a visita do líder dos socialistas galegos, xa que cre que é necesaria a implicación dos axentes políticos na loita social e pola integración, bases nas que se apoia a entidade que ela mesma fundou. 

 

Pola súa banda, Caballero encomiou a figura de Carmen Avendaño como muller coraxe e como referente no mundo asociativo, engadindo que non puido rexeitar a invitación da presidenta. Tamén trasladou o seu recoñecemento público á asociación e á fundación pola loita contra o dano que a droga e os narcos fixeron e seguen facendo na sociedade. 

 

Recalcou o apoio a Carmen Avendaño, en nome do PSdeG, ante a demanda de Oubiña, que "consideramos inxusta". Un xuízo que se celebrará o próximo día 27 e que contará co apoio de todo o equipo humano de Érguete no xulgado.

 

Gonzalo Caballero tamén lembrou o abandono que, segundo a súa opinión, o goberno de Feijoo está a exercer na sanidade pública galega e no financiamento a ONG similares a Érguete e instou aos populares galegos a participar e secundar a folga o próximo 8 de marzo en apoio á igualdade entre mulleres e homes.